Рук жовтого пацяти: што звізди пророчать закарпатцям (ЕКСКЛЮЗИВНИЙ ГОРОСКОП)

Но што, бабчині солодинькі, скоро Новий рук і то буде рук жовтого пацяти. Мож ся нараз здогадати, што свинину бажано на стул не класти аби не сердити нову ґаздиню. Што то значить для закарпатцю? Ниякого тобі шовдаря! І кльиґанця тоже! Такий собі початок. Но айбо ми не про то, ми про пророцтво звізд. Спеціально для Вас, ексклюзив від 0312:

Овен, Баран щи у нас кажуть

Сим чілядникам буде доста тяжко, но лем дись до марта. Можете починати робити дашто новоє, айбо никому не кажіть, бо люди всякі є. Кіть шось, спокойно побзерайте і повічте "не дамся вузвідати". Звізди також вам радять не дуже душу откривати новим знакомим. Мирькуйте ядним словом!

Телець, Бик булше для нас звично

Новості є дві і як то часто - ядна пулла, друга мало ліпша. Почнеме з ліпшої. Буде шось мінятися, но не факт, што то принесе вам радость. Якісьте вже поняли, то била друга новость. Айбо не всьо так по ничому! Сись рук для Вас, то рук любові. Бережіть своїх жун, чоловіку, любовниць і любовнику. Кіть не маєте, заведете си дакого.

Близнята

Аби пити шампанськоє, мусай мало ріскувати. Не буйтеся, мало начудіть. Будете довольні от того всього. Но кіть шось, претензії у редакцію не пишіть. Щи звізди шипчуть ош з грошима буде файно. Но а кіть з грошима всьо файно, понялисьте ай куда клониме? Чкода, што не всі Близнята сього року.

Рак

Мусай мало побзерати за здоровлям. Кивайтеся булше. Бігайте зрана, бажано не по хижи через то, шосьте проспали. Скакалку си купіть. Звізди пророчать ош буде у Вас у 2019 много всякого нового. Надіємесь, то не лем про скакалку. Ядно просиме, не бануйте за тим, шо пройшло, бо давно вже то загуло.

Лев

Мирькуйте файту свою, не робіть дурниць і спокойно собі чекайте 2020 рук. Паця мало буде друляти Леву на всякой дурной. Но айбо ви у нас щи ті бітярі. Знаєте, нє? Малинько й так дасте си світа увідяти, но і світови тоже дашто вкажете, кіть чесно.

Дівуля

Много, дуже много роботи. Як усе, кіть чесно. Не лінуйтеся усьо то чинити, через то Паця на гроші буде з Вами щедрой. По любовним ділам притормозіть - без "навхтема в рокаши", припозерайтеся щи чи вам то треба. 

Терези

Мало думайте - много робіть. У 2019 лем так. Кіть маєте бізнес, а бізнес мало ко не має на Закарпаттю, цигаратлики тоже щитавуться, буде всьо дубрі. Гроші гребсти лопатов не вдастся, но доллари міняти не треба буде. Кіть замість бізнеса маєте начальника, глядайте другу роботу або чиніть бізнес і помніть, што цигаратлики тоже щитавуться.

Скорпіон

Вам, небораки, повезло, а врагам Вашим не дуже. Не нам Вам розказувати, но сього року буде шось - чим булше буде на пути Вам встрічатися даяких проблем, тим  ліпше для Вас, проблеми усі порішаєте і од того будете лем щи муцніші. Тяжко буде мало веснов, но до літа будете качулятися як сир у маслі.

Стрілиць

Не знати што Вам сього року ліпше буде вдаватися - шури-мури чи робота, лем, нараз кажиме, бисьте не думали про шури-мури на роботі. Гроши мало буде не хватати, так шо глядайте де мож мало пудзаробити, кіть шось звідайтеся у Терезу.

Коза з рогами

Паця удивить Вас, люди добрі. Фінанси не будуть піти для Вас романси. Робота - як горі лазивом, будете лізти. Любов? Не всьо нараз, може штось перепаде файной у 2020. І посокотіться мало, не похібить Вам.

Тот, што воду ллє

Файта, то велика сила. Бережіть родичю, бо родичі будуть берегти Вас. І помніть, світ на Вас не зойшовся, уважайте тих, ко коло Вас, не вадьтеся з ними, они нич Вам не довжні. Но і Ви їм тоже. 

Риби

Паця хоть і щедрой на гроші, Ви там у 2019 не дуже кільтутеся. Доллар до форінта, форінт до доллара. Не переробляйтеся, спочивайте, бо кіть будете хворі, то доллар до форінта не ткладеся. 

Хеппі Ню Єр, бабчині солодинькі! Дуже не напийтеся! Щи си на Руздво дасте мало! 

А кіть маєте даякі претензії до слов, помніть, - чим булше дров, тим ближе Перечин. У каждому силі говорять іншак.