Туй ся родять файні діти: У мережі жартують про хрестини "по-закарпатськи"

Хрестини на Закарпатті традиційно - одне із найважливіших родинних свят.

Цього разу воно ще й стало приводом для жартівливої замальовки. Текст опублікувала користувач Маріка Данканич у спільноті "Кавилюєм і фіглюєм" в мережі Фейсбук.

Нижче подаємо цілий допис мовою оригіналу:

"В Закарпатті файна природа, завто туй ся родять дуже файні діти. И приблизно сяк ото є у каждів поряднів закарпатськів родині:

1.Тест указав дві паличкы и удтипир жона прирівнюєся до Богині - всі ся носять з нив ги з писаным яйцьом.

2. Даз за два тыжні до родів за Роженицю кажуть ож она на розпаді. Вже всі переживавуть, кажду годину звідавуть ци нич она ни чуствує. Чоловік ни як ни годен ся оприділити - ити йому на роды ци нєт.

3. Началися схваткы, всі скачуть у машины и по ямах литять у роддом, де їх чекать дохтор, якый наконєц-то почуствує в жибі довгожданну суму. Всі в паніці моляться и чекавуть, коли ся появить на світ новый закарпатиць.

4. Урра!!! Родилося дітинча! Молодый отиць біжить усьых гостити-се єдінственный раз у жизни, коли жона гордиться тым, кілько днів чоловік пив, бо він, сиґіняшный, сяк указує свою радість за дітину. Кидь чоловік быв у родзалі, та він у очах жоны типир супергерой и його смілости цімборы завідувуть. Новина скоро ся поширює и так же скоро всі рахувуть узада 9 місяців до свальбы, ко го знає, а кідь...!

5. Бабкы, особенно мати рожениці, начинавуть скуповувати ушитко для онучати. Усі бовты з децькым товаром они знавуть на памнять. Межи бабами иде конкуренція, чий костюмчик май паранный, чия бавка май ся любить дітіні. Дідикы уявлявуть як они будуть ити на рыбалку з онуком, як будуть возити в машіні онучку. Усі ся приникавуть у чію файту ся вдала дітина.

6. У роддом обізатєльно йдуть майблизькі родичі, кумове, цімборы и несуть їсти. Левеш из домашньої куриці, суканиця вбы молоко прибывало. Ото ся дуже цінить, ко принесе домашню наварену їду, а не купованоє. Рожениця всьых буде помнити, ко д нів быв и ко ни быв!

7. Первоє купаня. Над ванночков усі плотно стоять кольцом, бабы начинавуть згадовати усі народні примети, молода мама розуміє яка вна щи далека уд тых знань. До христин д дітіні никого ни пускавуть, челлена нитка типир ги панацея, на сон треба лишити нитку сся. Кидь дітина войотить, споминавуть, ко ї міг уректи.

8. Типир ся ладять до Хрестин чим майскоро! Ото велика чисть, кого кличуть за батичка, а щи кидь батичко при посаді та вобще! У Иршаві завто батичків і маточок у дітины много.

9. На таїнство хрещення мавуть право прийти лем дуже близькі. Піп ся вже й не чудує ош хрищині ни знавуть молитву «Вірую» и завто каже вбы повторяли за ним. Крижма уд хрещеных набираться такої сятости, ги бы мироточила. Дітині дали ймня, но в жизни у ниї и так буде якась назывка типа Анці-бовтошкані, Марікы-рікової, Василя-базароша, Міші-каміонщика і т.д.

9. Хрестины вто ги мала свальба, повно гостів, ресторан, подаркы. Благо палинка ся впстала з свальбы. Всі ся радувуть новому члену родины и звідавуть, коли буде другоє. Удтипир жона буде у мельчайшых деталях розказовати як ся вна натирпіла у схватках, но її страсті ото нич пиля того, як ся намучив чоловік, котрый быв на родах и держав дітину на руках.

10. Ангелик у хыжи потихы росте, бабы и діды помолоділи уд емоцій, спорять дале на кого дітина похожа, с кым на старости ся впстане внуча, чия ся хыжа перепише на внуча. Обы ни кого ни обідити молоді батькы яннако завозять онуків у гості до бабок. Кажда бабка знає што любить їсти її онуча и у любоє врем‘я суток дітині ся вто робить шіковно. Дітина для них типир центр Всесвіту.

11. Дітина не знать як звати бабок и дідиків, а знає што є «наші» и «ваші». Як правило у хыжи бабкы (маминої мамы ) май мош розмітовати дітині. Люба бабка нараз зазвідать дітину ош што їв приніс Миколай у другої бабкы.

12. Молоді мама з татом щасливі ош їм помагавуть батькы и поняли, ош дітина вто ни обуза, а радість. Свої радісні емоції регулярно укладавуть у Фейсбук!Діти нашоє будущоє та я вам завто «бажаю тілько діточок, ги на нибі зірочок»! Вбы лем были здорові!!!

Маріка Данканич 18.11.2018